Giguyod sa katubhan, gi-rape

Gikulata pagkahuman giguyod sa katubhan una pa gilugos ang 15, anyos nga dalagita nga gikan nga mitambong og disco didto sa Sityo Navarra, barangay Canhabagat lungsod sa Medillen, Cebu niadtong Martes sa ala una sa kaadlawon.

Ang biktima nga  15 anyos  molupyo sa maong barangay. Samtang ang gitumbok nga suspetsado naila nga si Patricio Book Jr, hingkod ang panuigon ug silingan ra usab sa biktima.

Gibutyag ni SPO1 Roland Reyes sa dihang nahinabi sa Banat News subay sa inisyal nga imbestigasiyon mitambong og disco ang biktima sa maong lugar kauban ang iyang duha ka amiga nga babaye nianang Lunes sa gabii.

Apan nag-una og pamauli ang duha niya ka amiga hinungdan nga nag-inusara na lang nga mipauli ang biktima pagka ala una sa kaadlawon.

Ang suspek daling miduol ug mitanyag sa biktima nga ihatod sa pagpauli apan mibalibad ang biktima hinungdan nga sa tanto nilang paglakaw kalit lang gisukmag sa suspek ang tiyan sa 15 anyos nga dalagita paghiabot sa katubhan nga dapit.

Pagkahuman giguyod niini ang biktima sa sulod nga bahin sa katubhan ug didto gilugos.

Matud ni SPO1 Reyes buntag na nga nakapauli sa ilang pinuy-anan ang biktima ug misumbong   sa iyang mga ginikanan kabahin sa nahitabu kaniya hinungdan nga ang inahan niini  maoy midala sa biktima pagsang-at og reklamo sa Medillen Police Station.

Daling mipahigayon og hot pursuit operation ang kapolisan apan wala na sa pinuy-anan niini ang suspek.

Kagahapong adlawa pormal nga gipasaka sa kapolisan ang kasong pagpanglugos batok sa suspetsado.