Brodkaster gidakop tungod sa libelo

Gidakop ang usa ka brodkaster nga kanhi mayor didto sa iyang pinuy-anan sa Poblacion, lungsod sa Compostela,Cebu niadtong Martes sa alas 10 sa buntag tungod sa warrant of arrest nga giluwatan sa korte may labot sa duha ka counts nga kasong libelo niining giatubang.

Ang magsisibya nga si Gilbert Reyes Wagas, 44, minyo, molupyo sa nahisgutang lugar gidakop subay sa warrant of arrest nga giluwatan ni Judge Douglas Marigomen sa RTC Branch 5.

Gibutyag ni PO3 Oliver Rondina sa Compostela Police Station nga maoy nag-serve sa warrant dihang nahinabi sa Banat News niadtong Biyernes sa hapon nadawat nila ang maong warrant ug tungod sa ka-apeke na sa panahon kagahapon lang nila kini na serve.

Hinuon gibuhian lang usab dayon si Wagas human kini makabutang og piyansa nga P70,000 didto sa korte.

Si Bise Gobernador Greg Sanchez maoy mipasaka sa maong kasong libelo batok ni Wagas gumikan sa mga  komentaryo niini batok kaniya ug sa iyang gipanag-iya nga produkto atol sa tulomanon sa radyo niini nga nag-ulohan og “Wagas ug Gawasnon”.