Polis nga na-entrap nag-atubang og laing kaso

Nag-atubang na usab og laing kaso ang polis nga si SPO1 Romeo Cabrera human gireklamo sa usa ka babaye nga nanag-iya og kan-anan diha sa N. Bacalso Avenue ning dakbayan nga nagbinastos kaniya.

Usa ka Arlene Naval, hingkod, dalaga, residente sa Sambag 2 ning dakbayan ang miluwat og affidavit aron maimbestigar ang maong polis ug nagtinguha usab siya sa pagpasaka og kaso niini.

Ang maong reklamo gipadangat ni Naval ngadto sa City Traffic Management Division niadtong Enero 28 sa milabay'ng buwan ug gipadad-an og kopya ang Ombudsman Visayas, CCPO Director, National Police Commission.

Hinuon ang Traffic Division ni-inhibit sa pag-imbestigar kabahin sa maong reklamo ni Naval aron malikayan ang pagduda nga dunay mahitabong “white wash” o ba kaha bias ang ilang imbestigasyon batok kang Cabrera.

Base sa affidavit ni Naval nga pasado alas 7:30 sa gabii niadtong Enero 25, 2008 adlaw'ng Biyernes si SPO1 Cabrera uban sa laing duha ka tawo nga nailhan lang sa pangan nga “Yox” ug “Marlon” ang misulod sa iyang kan-anan sa Nav’s Foodhauz ug ni-order og beer dayong lingkod sa lamesa kinsa niadtong tungora diha usab ang mga personnel sa Land Transportation Office.

Human makahurot og ubay-ubay nga beer, pagkaon ug sigarilyo ang suspetsado miduol kang Naval dayong pangutana pilay bayranan sa ilang gi-order.

Mokabat sa P633.00 ang bayranan apan nireklamo si Cabrera kung nganong niabot sa maong kantidad ang ilang gi-order.

Ang maong polis giingong nasuko ug dayong gisi sa papel diin gisuwat ang bayranan ug nagbagolbol nga mahal ug ang bangko nga plastik gilabay ni Cabrera nga nakahatag og atensiyon sa ubang kostumer niadtong higayona.

Matud ni Naval nga iya nalang giusab og suwat sa papel ang bayranan nilang Cabrera human gisi-a niini apan gi-gisi gihapon ang papel sa maong polis ug mikuha na usab og laing bangko dayong labay hinungdan nga nakamugna og kabalaka sa ubang mga kostumer ug giaksyonan pa siya og tamparos ni Cabrera.

Nisuway og panawag sa 166 si Naval aron mangayog police assistance apan giingnan siya niini nga bisan og 155 ang tawagon dili siya mahadlok.

Apan nasuta ni Naval nga dili diay si Cabrera ang mobayad sa ilang giinom nga beer ug pagkaon kundili usa ka personnel sa LTO nga nailhan lang sa pangan nga “Carlo”.

Si CCPO Director Sr. Supt. Patrocinio Comendador nagkanayon nga ang maong reklamo ni Naval giimbestigar na sa Internal Affairs Service (IAS).

Matud ni Comendador tukmang lugar ang IAS nga mo-imbestigar sa susama niining reklamo batok kang Cabrera nga matud niya usa ka misconduct ang gihimo sa maong polis.

Apan giklaro ni Comendador nga walay kalambigitan ang maong reklamo ni Naval sa giatubang ni Cabrera nga laing kaso human madakpi sa entrapment operation human kini pasanginling nangilkil sa usa ka Almar Cabahug bugti sa dili pagpasaka og kaso sa hinigugma nga si Patrick Tambog sa nahitabong insidente sa kadalanan.