Gipusil ang usa ka bombero human kini gitulis sa duha ka mga tawo samtang nagmaneho kini sa taxi didto sa Sitio Kolo Barangay Pajac dakbayan sa Lapulapu sa milabay’ng gabii.
Ang biktima mao si FO1 Tyron Gocela, 38, ug residente sa Casili, Consolacion ug usa ka sakop sa kabomberohan sa dakbayan sa Sugbu diin nagmaneho sa Filmer taxi isip sideline.
Matud pa ni Gocela duha ka mga tawo ang misakay sa iyang gimanihong taxi didto sa Gun-ob, dakbayan sa Lapulapu ug buot kini nga magpahatod sa Pajac, apan sa pag-abot sa usa ka hilit nga dapit mikalit kini og deklarar nga tulis.
Ang pasahero sa likod nga bahin mition kaniya og kalibre .38, apan kini misukol hinungdan nga kini gipusil sa maong tulisan.
Bisan pa nga samaran si Gocela sa iyang liog ug ubos nga bahin sa iyang dalunggan nakahimo pa kini og kanaog sa sakyanan ug midagan samtang nangayo og pakitabang sa mga residente sa maong dapit.
Ang duha ka mga tulisan dali kini nga misibat sa maong dapit agi sa mga kabalayan sa maong lugar hinungdan nga sa pagresponde sa kapolisan ug sa TRS pakyas kini sa pagsikop sa mga responsable.
Gidali og dala si Gocela sa Mactan Doctor’s Hospital ug gibalhin kini sa Chong Hua Hospital diin kasamtangang gi-obserbahan sa mga mananambal.
Matud pa ni PO3 Elmer Canillo sa Theft and Robbery Section sa Lapulapu atol sa ilang paghiling sa maong sakyanan ilang nakuha ang usa ka kabhang sa kalibre .38 ug sa padayong imbestigasyon ngadto sa biktima nasuta nga wala makuha sa mga tulisan ang balor P3 mil nga kinitaan unta ni Gocela.
Matud pa ni Canillo kun normal na ang kahimtang ni Gocela ila ipakita ang mga hulagway sa mga bangiitang tulisan sa ilang gallery alang sa pag-ila sa mga suspetsado.
Si Gocela nag-sideline pagka driver sa taxi atol sa iyang day-off isip sakop sa kabomberohan sa dakbayan sa Sugbu.