Pusher bilanggoon og life

Gihukmang mabilanggo sa tibuok niyang kinabuhi ug pabayaron og P500 mil nga multa ang usa ka pusher og shabu ni Regional Trial Court (RTC) Judge Gabriel Ingles sa Branch 58 kagahapon sa buntag.

Si Wilfredo Layao Arias, 20, taga Barangay Tisa, niining dakbayan usa ka timekeeper sa billiard ug nagtrabaho usab kini sa usa ka nag-export og mga mangga ang nasikop sa gipahigayong buy-bust operation sa kapolisan sa Cebu City Police Office niadtong Disyembre 29, 2006 diha sa sudlonong bahin sa Unit 3 Carbon Public Market niining dakbayan.

Sa maong operasyon  nasakmitan nila ni PO2 Mariano Aluba, PO2 Elebert Juaneza ug PO1 Elmer Marrok og 0.03 gramos nga shabu si Arias.

Uban usab sa maong operasyon si PO1 Danilo Playda kinsa nadestino   sa Drug Enforcement Unit (DEU) sa CCPO ug maoy poseur buyer sa nahisgutang pagpangronda.

Si Arias mipasangil nga diha siya sulod sa banyo sa iyang gitrabahoan dihang tulo ka tawo kinsa  nakasibilyan ang  mibunlot  ug mikulata  kaniya dayon gidala siya sa police station ug wala siya i-body search niini.

Ang maong mga lalaki iyang nahibaw-an nga mga polis dihang gidala siya niini ngadto sa Gorordo Avenue ug gidetiner sa Mabolo police station ug gidala siya sa Cebu City Medical Center  alang sa pagpakurasyon.

Lima ka adlaw human siya mapriso sa Bagong Buhay Rehabilitation Center (BBRC) diha pa siya makahibawo sa kaso nga gipasaka batok kaniya.

Si Judge Ingles ang mihatag og pabor sa mga testimoniya sa mga polis tungod kay napamatud-an sa prosekusyon nga si Arias  namaligya gyud sa nahisgutang ginadiling drugas hinungdan nga nahukman kini sa maong silot ug multa.

Sa laing bahin, naabswelto ang usa ka 24-anyos nga lalaki kinsa gipasanginlang naghupot og linikit nga marijuana tungod sa kakuwang sa mga ebidensiya batok kaniya.

Ang akusado mao si Joel Datuel, taga Barangay Lorega niining dakbayan ang gisikop sa mga sakop sa Barangay Intelligence Network  nga sila si Alberto Limbaga ug Jerry Milan parehong nakadestino sa Police Station 5.

Si Datuel  paingon sa Carbon dihang nasikop  tungod kay giingong nagdala  kini og kutsilyo apan giangkon sa akusado nga gilabay niya ang nahisgutang kutsilyo ug dihang gi-body search kini sa sakop sa BIN giingong nakuhaan kini og usa ka linikit nga marijuana ug ang maong ebidensiya gitugyan nila ngadto kang PO1 Joseph Bacutan.

Ang korte nagkanayon nga ang akusado wala aktohe sa pagkasikop  nga naghupot og kutsilyo ug ang maong pag-angkon sa akusado nga nagdala siya og kutsilyo ang dili makapabalido sa iyang warrantless arrest ug bisan pa sa giingong nakuhaan kini og linikit nga marijuana  dili gihapon  magamit batok kaniya tungod kay ang body search dili makunsiderar  incidental  lang  apan dili kini  paigo aron ipatuman  ang pag-aresto.