Gipahigayon ang pagpinirmahay sa Memorandum of Agreement (MOA) alang sa pormal nga pagpatuman sa Benhur Burial assistance program ni Kongresista Benhur Salimbangon alang sa iyang mga konstituwente sa 4th district.
Ang regional director sa Department of Social Welfare and Development (DSWD-7) Teodolu Romo, Jr. maoy mipirma sa MOA tali ni Salimbangon alang sa pormal nga pagpatuman sa maong programa.
Ubos sa maong programa makapahimulos og burial assistance ang tanang mga molupyo sa walo ka lungsod ug usa ka siyudad sa 4th district nga tag P2mil sa matag pamilya nga mamatyan og 12 anyos paubos ug tag P3 mil sa mamatyan nga nagpangidaron og 2 anyos pataas.
Apan gi-klaro ni Salimbangon sa mga tigbalita nga ang makapahimulos niini gikinahanglang makapresentar og mga rekisitos sama sa Benhur Health card, dunay endorsement letter, medical certificate ug statement of account.
Atol sa MOA signing gipahibalo sab ni Salimbangon ang iyang inisyal nga pagbutang og P2 milyones nga pundo alang sa maong programa nga adto niya kuha-on sa Mariquita Salimbangon Yeung (MSY) Foundation samtang wala pa moabot ang iyang PDAP.
Ang maong programa gitumong aron matabangan ilabina kadtong mga kabus nga molupyo sa maong distrito panahon nga dunay mamatay nga sakop sa ilang pamilya.