Gipabutangan na kagahapong adlawa sa Cebu City Police Office og usa ka detachment sa kapolisan ang karaang barangay hall sa Busay ning dakbayan.
Si Cebu City police director Patrocinio Comendador mipahibalo sa mga sakop sa media nga gipabutangan og detachment ang maong area tungod sa request sa mga opisyal sa barangay pinaagi sa resolusyon aron adunay makabantay sa ilang lugar batok sa krimen.
Matud pa niini nga ang maong lugar sa Busay strategic kaayo ilabi na ang Nivel Hills nga daling makahimo’g blockade ang kapolisan sa kadalanan sa maong barangay kun adunay krimen sa ubang dapit ug himuon kining agianan.
Giklaro niini nga lisod usab kaayo sa kapolisan sa Mabolo ang pag-responde gilayon kun adunay krimen sa maong dapit gumikan usab sa gilay-on niini.
Sumala pa niini nga ang maong detachment adunay lima ka mga sakop sa kapolisan nga magbantay 24 oras nga mga pinili gikan sa Security Service Group (SSG).
Sa nasayran nga ang mga opisyal sa barangay Busay pinanguluhan ni Kapitan Eliodoro Sanchez niadto pang miaging tuig nga nagtinguhang mabutangan og outpost sa kapolisan ang ilang barangay.