30 ka motorsiklo gipang-impound sa Liloan

Mokabat sa 30 ka motorsiklo nga gituohang gigamit sa ilegal nga kalihukan   gi-impound sa kapolisan sa dihang ilang nadiskubrehan nga wala marehistro ug  ang drayber nga nagdala wala usab makabaton og lisensiya.

Si PO3 Ricardo Enriquez nga nahinabi sa Banat News miingon nga ang maong gidaghanon sa motorsiklo ang ilang nasakmit sa checkpoint nga gihimo sa miaging gabii sa lungsod sa Liloan.

Matud pa ni Enriquez nga ilang gihingusgan ang pagpansakmit  og  mga motorsiklo atol sa checkpoint   tungod  sa nagkadaghang panghitabo nga pagpanulis sa Liloan.

Si PO3 Enriquez miingon hilabihan ang pagdagsang sa mga pagpanglabni ug mga pagpanulis  diin ang isnatser ug tulisan magsakay og motorsiklo.

Kini ang hinungdan sa paghingusog sa ilang kampanya sa pagpangrikisa sa  mga motorista sa maong lugar.

Si PO3 Enriquez miingon  nga  pipila ka mga tag-iya nga nakasumiter sa ilang lisensiya sa pagmaneho og rehistro sa motorsiklo  ilang gihatag og balik ang ilang motorsiklo nga gi-impound. (Romeo T.  Limpangog)