Merkado sa M’daue ang maablihan na

Ang merkado publiko sa dakbayan sa Mandaue nga giugmad panahon pa ni kanhi Mayor Thadeo Ouano ang hingpit nang maablihan niining tuiga.

Kini ang gipadayag ni Acting City Engineer Dario Mago ngadto sa mga sakop sa konseho nga mipatawag kaniya atol sa regular session sa miaging adlaw.

Matud pa niya nga hingpit na nga nahuman ang phase 1 sa maong proyekto ug ang phase 2 nga padayon nga gitrabaho ang anaa na usab sa 85 porsyento.

 Dugang pa niya ang maong proyekto maoy kabahin sa 11 ka mga dagkong proyekto nga wala mahuman sa pagtrabaho sa miaging tuig nga gipadayon karong panahona.

Si Engineer Mago miingon nga ang mokabat sa P40 milyones nga kantidad nga water treatment facilities sa giugmad nga bag-ong merkado ang gitrabaho sa iyang buhatan.

Kini maoy iyang gipahibalo sa konseho isip tubag kang Majority Floor Leader Victor Biano kinsa personal nga naghimo og pakisusi sa  proyekto.

Matud pa niya nga naglakip sa maong mga proyekto nga wala mahuman mao ang mga dalan ug mga kanal nga kasamtangan karon nilang gitrabaho ug gipaningkamotan nga mahuman  sa sunod nga mga bulan karong tuiga.

Si Engineer Mago miingon nga subay sa mga proyekto nga ilang gipatuman maoy ilang natala ang 33 ka mga road  section sa dalan nga ilang giaspalto ug 19 mga libaongon nga mga dalan ang ilang natapakan.