P20M ekipo sa OPASCOR giinagurahan

Pormal nga gi-inagurahan kagahapong adlawa diha sa Cebu International Port Authority (CIP) ang mokabat sa P20 milyones nga balor sa mga modernong ekipo sa Oriental Port and Allied Services Corporation  (OPASCOR) nga mopalambo sa panerbisyo sa cargo handling dinhi sa pantalan sa Sugbu  ning mosunod nga mga adlaw.

Ang mga modernong ekipo gilangkuban kini sa tulo ka unit nga brand new Prime Mover nga mokantidad og P2.5 milyones, duha ka forklift nga mobalor og P7 milyones, usa ka rich stacker nga mokantidad og P7 milyones, upat ka chases nga mokantidad og tag P400 mil ang matag usa ug ang 4 ka Cummins engine nga tag P800 mil  matag usa nga gipalit gikan sa nasud sa Hongkong ug Japan.

Gipahigayon usab kagahapon ang re-engine sa upat ka trans- tainer sa Opascor.

Ang presidente sa Opascor ug General Manager nga si Atty. Tomas Reveral nibutyag sa mga tigbalita nga ang maong mga ekipo nagsilbing back equipment sa higayon nga maguba ang mga existing nilang kahimanan nga maoy kasamtangang gigamit sa cargo handling sa pantalan sa Sugbo.

Gi-klaro ni Reveral nga tipik ug kabahin kini sa lima ka tuig nga plano sa CIP nga palamboon ang operasyon sa pantalan sa Sugbu nga walay ma-usik nga pundo ang gobiyerno.

Matud ni Atty. Reveral wala pa kiniy labot sa P170 milyones nga gi-loan niini sa Equitable PCI bank nga gastohon pag-upgrade aron mahimong moderno ang tanang operasyon sa pantalan sa Sugbo ilabina gyud ang cargo handling.

Gipasabot ni Atty. Reveral nga nakabayad na sila og P1.3 nga down payment alang sa pagpatuman sa modernization plan sa cargo handling sa CIP ug karung adlawa gitakdang moabot dinhi sa Sugbu ang mga technical expert aron mosusi sa lugar ug pagka bulan sa Marso ang pormal nga pagsugod sa trabaho.

Taposon ang construction sa pagkabulan sa Hunyo ug pagka bulan sa Hulyo mahimo na kining operational.

Ang Cebu Port Authority (CPA) Commissioner nga si Carlos Co nihangop sa maong programa sa Opascor nga gihulagway niya nga makahatag og konbinyente sa mga importer.

Gawas niini makapakunhod pa kini sa overtime work sa mga kawani sa Opascor diha sa pantalan sa Sugbu.

Matud ni Co ang dugang binipisyo niini mao nga makaminos sa gasto ang CPA gikan sa suholan sa mga overtime pay sa mga kawani gikan sa 10 ngadto sa 30 porsiyento.