Mga telecommunication company pabayran na unya og franchise tax sa kagamhanan sa dakbayan sa Mandaue sa umaabot nga mga adlaw. Ang ilang pagbayad matigayon human usab sa paghingpit nga pagpalabang sa ordinansa nga nagtugot sa kagamhanan sa pagkolekta sa maong buluhisan.
Si Majority Floor Leader Victor Biano nga maoy nangamahan sa ordinansa mipasabot nga ang dugang buhis masulod sa panudlanan sa kagamhanan gikan sa nakolektang franchise tax sa mga telecommunication company sa dakbayan.
Naglakip sa mga telecommunication company nga nahimutang sa dakbayan nga gitinguha ni Biano nga mobayad sa ilang franchise tax mao ang Skycable, Philippine Long Distance Company (PLDT) Smart, Globe ug uban pa.
Gitataw ni Biano nga sa mahingpit ang pagpalabang sa maong ordinansa maoy unang pagahimoon ang pagpahigayon og public hearing sa mga tagdumala ug mga konsumidor.
Sa miaging regular session ang representante sa Skycable maoy unang gipahibalo ni Biano ug giingon wala kini mopakita og pagsupak.
Si Biano miingon nga ang dugang makolektang buhis gitumong alang sa pagpalambo sa serbisyo sa kagamhanan ngadto sa mga Mandauehanon. (Romeo T. Limpangog)