Babayeng kaslonon, mabdos naghikog

Usa ka batan-on nga babaye nga gikatahong kaslonon karong tuiga ug nagsabak og duha ka bulan  naghikog  human miambak sa pangpang nga may giladmon 30 ka tiil niadtong Domingo sa udto diha sa National Highway, barangay Calumpang gibanabana sa kapolisan nga 18 ka kilometro ang gilay-on gikan sa Poblacion, Oslob, Sugbu.

Ang naghikog giila sa kapolisan nga mao si Jane Gercillea, 19, lumad nga taga Daanbantayan ug temporaryong nagpuyo sa balay sa iyang pamanhunon sa nahisgutang dapit.

Base sa pasiunang imbestigasyon ni SPO4 Isagani Tinapay sa Oslob Police nagbutyag nga sa wala pa mahitabo ang insidente si Gercillea nagkuyog sa iyang pamanhunon nga si Gionneve Sormeon, 20,  nga nangaon sa usa ka karenderya sa nahisgutang dapit nianang pasado alas 12 sa udto niadtong Domingo.

Human sa ilang pagpangaon nanguli sa ilang balay.

Segun sa giasoy ni Sormeon ngadto sa kapolisan nga samtang sila diha sa balay wala siya dayon makabantay nga milakaw diay si Gercillea ug niadto padulong  sa pangpang diin ang ubos niini dagat mga 200 metros ang distansya sa balay niini.

Dugang taho nga mao na lang ang nakit-an ni Sormeon nga didto na sa layo ug iya kining gisundan kuyog sa usa niya ka igsuong lalaki.

Daling gipahimangnuan ni Sormeon ang pangasaw-onon nga dili mohimo og dautan apan inay nga mopatuo kini sa iyang gisulti gitangtang ang relo diha sa bukton, tsinelas ug kutsilyo ug gihatag ngadto sa iyang igsuong lalaki dungan sa pag-ingon “ingna ako mama kong mangita sila, Ingna patay na ko,” dayong ambak sa pangpang diin ang ubos daplin sa baybayon nga  kabatuan  ug panason kaayo.

Si Gercillea nakaangkon og daghang samad sa ulo, mga bali ug bun-og sa kalawasan kinsa daling gihatod sa Oslob District Hospital apan gideklarar kining patay na nga miabot sa maong tambalanan.

Dugang butyag ni Gionneve sa kapolisan nga sa miaging adlaw si Gercillea misulti nga duna siyay problema nga dili gyud niini ikatug-an sa personal nga maoy gituohan nga nakaingon sa iyang paghikog.

Si PO2 Nelson Saquibal sa Oslob Police mitug-an sa mga tigbalita nga hangtod kagahapon wala pa nila masayri kun unsa gyud ang problema ni Gercillea sanglit wala pa nila mahinabi ang mga ginikanan niini.

Miingon usab si PO2 Saquibal nga sa nangaging mga adlaw naghilak si Sormeon tungod sa problema sa iyang pangasaw-onon nga wala gyud siya sultii niini.

Matud ni PO2 Saquibal nga base sa gihimong eksaminasyon sa municipal doctor nasayran nga mabdos og duha ka bulan si Gercillea.

  Dugang nasayran sa kapolisan gikan sa pamanhunon nga gamay lang problema magsuko-suko dayon ug maghikog-hikog si Gercillea.