Walay madawat nga suhulan sulod sa napulo ka adlaw nga basic salary si PO1 Jose Randel Buscato, human napamatud-ang nakalapas sa simple neglect of duty.
Kini maoy gipagawas nga kamanduan ni Police Senior Inspector George Ylanan, hepe sa Criminal Investigation and Intelligence Branch (CIIB) nga human sa gipahigayong investigation ni SPO4 Manuel Cañete, subay usab sa recommendation sa hepe sa police station 7 sa Pardo PCI Aureo Sanchez.
Ang rekomendasyon ni Sanchez pito ra ka adlaw ang silot ni PO1Buscato gumikan sa pagkapunay niinig palta sa trabaho ug pagka-sige og ka-late, apan gidugangan kini og tulo ka adlaw tungod sa wala niini pagtuman sa mandong tubagon ang akusasyon batok kaniya.
Nasuta nga wala makahatag og igong tubag si PO1 Buscato, sa mga palta niini sa pagtungha sa trabaho niadtong Disyembre 10, 2007, Disyembre 29, 2007, Enero 14, 2008, ug Enero 17, 2008.
Si Ylanan nga nahinabi sa mga sakop sa media nagkanayon nga ang maong rekomendasyon ila pa kining iduso ngadto ni Cebu City Police Chief Patrocinio Comendador nga maoy mopirma sa kamanduan.
Iyang giklaro nga ang maong napulo ka adlaw nga walay sweldong madawat si Buscato wala kiniy kalambigitan sa imbestigasyon may labot sa pagkulata kaniya diin hasta iyang armas nakuha niadtong higayona sa milabay’ng bulan diha sa usa ka imnanan.
Gipasabot niini nga ang ilang gihimong investigation incidental lang kini sa kasong gi-atubang sa maong polis.
Gumikan kay gusto usab ni CCPO Chief Comendador nga makahibalo sa personalidad sa nahisgutang police kini kun nagtug-an ba sa tinuod.