Mahalong kabayo modagsang

Mga mahalon nga kabayo gikan sa Luzon, Mindanao ug  tibuok Central Visayas ang gikatakdang magkatagbo karong sunod semana alang sa pagsalmot sa horse show racing nga pagahimoon sa reclamation area sa dakbayan sa Mandaue.

Kini gipasiugdahan sa Cebu Equine Owners Breeders Sportmen Association (Ceobsa) nga gisakopan sa mga nanag-iya og kabayo gikan sa Masbate, Bukidnon,  Palawan, Bicol,  Quezon,  Leyte, Negros, Iloilo, Davao ug Cebu. 

Gawas sa mga mahalon nga kabayo nga maglumba maoy lakip sa mosalmot ang mga tartanilla sa Duljo sa dakbayan sa Sugbo kinsa lakip sa gihatagan og ilang kaugalingong kategoreya.

Ang nagbaton og labing matahom ug mabulokon nga dekorasyon nga tartanilla maoy pilion nga mananaug ug makadawat kini og dakong ganting salapi.

Ang Tabo sa Sugbo nga malakip usab sa gipasiugdahan sa maong kahugpongan diin sa mga tindahan nga ipahiluna sa maong lugar maoy mapalit ang nagkadaiyang kahimanan alang sa pagsakay og kabayo.

Ang lumba sa kabayo nga pagahimoon nga pagasugdan sayo sa buntag sa Pebrero 15 ang pagatapuson hangtod sa Pebrero 17 nga mao usab ang pagpahigayon sa awarding ceremony.

Ang buhatan sa Department of Tourism (DoT) ug ang kagamhanan sa lalawigan sa Sugbo ang naggahin og salapi alang sa pagtabang nga ubos sa Governor’s Cup 2008 nga lumba sa kabayo karong tuiga.