Lapulapu officials wala mo-lisod-lisod ni Pelaez

Gihimakak sa mga opisyal sa dakbayan sa Lapulapu ang pamasangil sa magpapatigayong si Efrain Pelaez nga  gilangay -langay nila  ang pag-isyu og business permit sa mga balay patigayun niini sa maong siyudad sama sa Marina Mall ug South Gate nga nahimutang sa Mactan Export processing Zone kon Mepz.

Gibutyag ni Lapulapu City Attorney Joseph Vincent Lim dihang nahinabi sa Banat News nga ang tinuod si Pelaez maoy wala mo-comply sa tanang rekisitos hinungdan nga hangtud karun wala gihapon kini ma-isyuhi og permit.

Giangkon ni Lim nga gituman ni Pelaez ang ubang mga rekisitos apil na ang pagbayad sa tanang bayranan apan dili kini garantiya nga maisyuhan na siya og business permit tungod kay hangtod karon wala pa gyud kini mo-apply og building permit.

Pabiling giinsister ni Lim nga ang paglukat og building permit alang sa mga balay patigayon ni Pelaez tipik ug kabahin sa mga rekisitos aron maisyuhan kini og business permit.

Si Pelaez una nang namasangil nga gilisod- lisod na usab karon  sa mga opisyal sa Lapulapu City Hall pinaagi sa paglangay langay og release sa iyang business permit karong tuiga bisan og nakabayad na siya sa obligasyon nga naasikaso na ang mga rekisitos.

Apan gipasabot ni Lim nga gikinahanglan gyud nga mo-apply si Pelaez og building permit sa siyudad dili lang sa MEPZ tungod kay ang Marina Mall ug South Gate nag-cater usab kini sa publiko og kun dunay mga dautang panghitabu sa maong edipisyo apil ang siyudad sa mabasol.

Giklaro sab ni Lim nga dili mahimo ang mga tenants sa maong bay patigayun ang mo-apply og building permit tungod kay kadto lang tag-iya niini ang gitugutan.

Si Pelaez maoy nagbulgar sa computer scam sa maong siyudad nga naglambigit ni Lapulapu mayor Arturo Radaza og ubang opisyal sa siyudad nga nag-atubang karon og kasong kurapsiyon sa Ombudsman Visayas.