Giaprobahan sa House of Representative atol sa ilang sesyon niadtong Miyerkules ang resolusyon ni Kongresista Eduardo Gullas nga naghatag og pagtugot kang Hilario Davide Jr., Ambassador sa Pilipinas ngadto sa United Nations nga modawat sa Papal Award nga “Grand Cross of the order of the knights of Saint Sylvester.”
Apan sa wala pa maaprobahi ang maong resolusyon nahuman na ang nahisgutang awarding, si Gullas nagkanayon nga ubos sa balaod, ang tanang mga opisyal sa kagamhanan ang gihatagan sa pagtugot nga modawat og bisan unsa nga award gikan sa mga langyaw nga organisasyon apan kinahanglan nga aduna una kini approval sa House ug Senado.
Niadtong Miyerkules usab ang Senado miaproba sa ilang kaugalingong version sa resolusyon nga gipangamahanan ni Senador Manuel Villar.
Niadtong miaging buwan sa Septiyembre dihang si Davide uban sa laing 13 ka mga Cebuano ang gipasidunggan og papal award ni Arsobispo Ricardo Cardinal Vidal diha sa Metropolitan Cebu Cathedral gikan ni Pope Benedict XVI, wala si Davide makatambong niini.
Ang mga natagaan sa maong pasidungog sila si Ernesto Aboitiz, Engelberto Alaba, Engineer Eriberto Caballero, Ver de la Cerna, Socorro Gonzales, Elena Jarantilla, Architect Melva Java, Nonito Limchua, Atty. Julius Neri, Dr. Montana Saniel, Dr. Rene Josef Bullecer, Philanthropist Norma Liu ug Josefina Matheu.