BRT ni Tomas supakon sa NADSU

Ang Secretary General sa Nagkahiusang Driver sa Sugbu (NADSU) Ruben Rama, miawhag kang Cebu City Mayor Tomas Osmeña nga unahon unta niini sa pag-atiman ang utang sa dakbayan sa Sugbu sa South Roads Property Project ug dili ang pagpatuman sa Bus Rapid Transports System (BRT).

Kini maoy gipadayag ni Rama dihang gikuhaan ug pamahayag sa Banat News subay ning lakang sa mayor nga nagduso sa BRT nga maoy haom nga makasulbad sa problema sa dagan sa trapiko ingon man sa hamugaway nga pagbiyahi sa mga pasahero.

Si Rama nagkanayon nga   aduna  silay pagahimuong lihok protesta batok sa proyekto   gumikan kay daghang mga kaldero ug mga operator ug driver ang makulban sa ilang pangita.

Matud pa niini nga mayoriya sa mga operators ug driver nga sakop sa Nadsu  ug ubang transport gruop ang nagkasabot na nga supakon kining maong lakang.

Sa ilang nahibaw-an nga kun mapatuman na sa hingpit ang BRT ang mga PUJ adto na kini makapamasahero sa habagatang bahin sa dakbayan sa Sugbu ngadto na silinganang dakbayan ug lungsod.

Iyang gipasabot nga ubos sa balaud walay katungod ang local government unit sa pag-usab sa prangkisa sa ilang mga rota gawas lang sa LTFRB.

Gawas pa ang maong proyekto nga BRT sa mayor makapasamot sa dakong utang sa dakbayan diin wala pa gani ma-impas ang pagbayad sa SRP lain na usab nga utang nga ang mga magbubuhis maoy pabayron.

Samtang subay niini iya usab nga giklaro nga dili usab sila gilayon modawat og bisan unsang offer sa mayor ngadto sa ilang mga miyembrong driver ug operator kini kun mapatuman ang maong proyekto.