Mahimo na unyang mamultahan ang mga department store o mga tindahan sa dakbayan sa Sugbu nga dili muhatag sa suklianang sinsiyo.
Kini sa higayon nga maaprubahan ang ipalabang nga ordinansahon ni konsehal Arsenio Pacaña nga alang sa maong katuyuan.
Hinuon sa proposal sa konsehal, kinahanglang mag-andam og kopon ang mga tindahan ug kini na maoy ihatag sa kustomer nga dili mahatagan ug sukli nga sinsilyo.
Kini aron magamit sa kustomer sa higayon nga mobalik pagpalit sa maong tindahan, ug susama ra gihapon nga kini nasuklian sa nahauna niining gipalit.
Naobserbahan ni Pacaña nga kasagarang tindahan sa dakbayan dili na mohatag og sukli nga sinsilyo og kendi na maoy isukli niini.
Ang maong matang sa paagi gihulagway sa Department of Trade and Industry nga usa ka matang sa pagpanglingla sa kustomer.
Kini giingong nalatid usab sa Consumers Act sa nasud partikular na sa article 50, nga dili husto ang pagsukli og kendi sa kustomer.
Gani niingon si Pacaña nga dunay mga higayon nga magkalalis ang cashier ug ang kustomer tungod sa kulang nga sukli.
Kadtong mga kustomer nga nagdali, mapugos lang usab sa pagdawat og kendi nga itunol sa tindera o cashier imbes sa nga sinsiyo.
Matud sa konsehal nga dili na unya makapangatarungan ang mga tindahan nga mahutdan og sinsiyo, tungod kay kopon na ang ipahatag niini ngadto sa ilang mga kustomer nga dili masuklian.
Sa higayon nga mahingpit nang ordinansa ang proposal ni Pacaña, mahimong mamultahan ang tindahan og usa ngadto sa lima ka libo ka pesos nga makalapas niini.
Nalatid usab hinoon sa proposal nga kadtong makalapas sa unang higayon mahimo kining pamultahon og P500 nga administrative compromise penalty.