Higpit nga gipasidan-an sa mga tinugyanan sa National Food Authority NFA nga mag-atubang og bug-at nga silot ang masakpang mamalhin ning bugas sa gobiyerno ngadto sa mga sako sa commercial rice.
Giluwatan kining maong pasidaan ni Edgar Diez tigpamaba sa NFA-7 kinsa nagkanayon nga nabungog na siya sa mga taho kalabot sa giingong ang mga sako sa Ganador ug Sinandomeng gigamit sa mga mapahimuslanong negosyante nga sudlan sa bugas sa NFA.
Gisubli ni Diez nga tag 18.25 ra ang kilo sa buas sa NFA apan kun ibalhin na kini ngadto sa sako nga minarkahan og Ganador ug Sinandomeng mahimo na kining P32 ug P34 matag kilo.
Sa pagkakaron ang orihinal nga bugas sa NFA uban sa prisyong P18.25 anha ra mapalit sa tindahang gipadagan sa Department of Social Welfare and Development DSWD sama sa Tindahan ni Gloria sa Palengke ug Tindahan Natin.
Kun naay mga bugas nga gimarkahan og NFA sa mga pribadong tindahan, dili na kini mga orihinal kundi mga iglalabay na para nalang sa mga hayop sumala sa mga reklamo nga nadawat ni Diez.
Apan giangkon ni Diez nga gawas lang kun makita nila sa akto ang mga lisensyadong negosyante nga mamalhin sa bugas sa NFA ngadto sa mga sako sa mahalong bugas nga commercial, dili gyud sila makapasaka og kaso niini.
Hinuon may mga negosyanteng napasakaan og kaso karon sa hukmanan gumikan kay nasakpan kining gipanagol ang bugas sa NFA ngadto sa mga mahalong bugas, matud pa ni Diez.
Apan matud pa ni Diez nga gumikan kay imported gikan sa Vietnam, Thailand ug China ang buga sa NFA dili na kini bintahaan sa kalidad sa Ganador ug Sinandomeng.