Kahimtang sa mga tindera sa malls makadaut

Giawhag karon sa konseho sa dakbayan sa Sugbu ang Department of Labor and Employment (DOLE) nga pahimangnoan niini ang mga employer sa mga sales ladies, ilabi na sa mga shopping malls nga nagdili kanilang  makalingkod sa tibuok adlaw samtang nagtrabaho.

Si Konsehal Edgardo Labella maoy nipalabang og resolusyon ug naaprubahan atol sa miaging sesyon sa City Council nga alang sa maong katuyuan.

Buot ni Labella nga mosagop ang mga employer sa modernong pamaagi sa shopping mall-based selling business nga gitawag og gender sensitive measure.

Naobserbahan sa konsehal nga kasagaran sa libuan ka mga tindira nga nanarbaho sa dagkong mga tindahan sa dakbayan, dili palingkuron sa management o sa ilang mga agawon.

“It has been observed by many concerned shoppers that the aforesaid sales ladies perform their tasks and duties without seats by standing all day long,” matud ni Labella.

 Kini gihulagway sa konsehal nga makadaut sa panglawas sa mga sales ladies ilabi na niadtong mga tindera nga nagsabak.

Tungod niini, giawhag ni Labella ang DOLE pinaagi sa iyang gipalabang nga resolusyon sa konseho nga magpakabana sa kahimtang sa mga sales ladies.