“Gi-nerbiyos” naghikog

Patay ang usa ka lalaki nga gituohang taud-taud nang nakasinati og “nervous breakdown” human kini maghikog pinaagi sa paghigot og pisi sa iyang liog nga gibugkos sa usa ka kahoy nga Mahogany didto sa sityo Tonggo, barangay Taloot lungsod sa Argao kagahapon sa kaadlawon.

Ang nagbitay na lang sa kahoy nga pinaluhod ang duha ka tiil sa yuta naila sa pangalan nga si Wilson Salarde Fuentes, 32 anyos, minyo, molupyo sa nahisgutang lugar.

Gibutyag ni PO1 Eduardo Semilla sa Argao Police Station dihang nahinabi sa Banat News nga gitug-an sa asawa niini nga nasakit og nervous breakdown ang iyang bana sulod sa unom ka bulan na ang nilabay.

Matud ni Semilla sa inisyal nilang imbistigasyon, nahibaw-an nga niadtong Miyerkules sa alas 9:00 sa gabii nag-estorya pa ang magtiayon sulod sa ilang kwarto sa dayun na nilang pagpangatulog.

Apan dihang nahigmata ang asawa niini alas 11:00 pasado sa gabii wala na sa iyang tupad ang iyang bana apan wala niya kini panumbalinga tungod sa pagtuo nga niadto lang kini sa iyang igsoon nga silingan ra usab nila.

Apan dihang paghigmata niya alas 6:00 sa buntag kagahapon wala gihapon sa iyang tupad ang iyang bana hinungdan nga nagdali siya og gawas aron sa pagsusi.

Didto iya na lang nakit-an ang iyang bana nga nagbitay na lang sa kahoy nga mahogany gawas sa ilang panimalay nga pinaluhod ang tiil nga wala nay kinabuhi.

Gibutyag ni PO1 Semilla nga sa gihimong autopsy sa medico legal sa lungsod sa Argao, walay foul play ang kamatayon niini.