Gwardiyang napatay walay bala

Gwardiyang napatay sa tulisan sa gasoline station walay bala nianang pagkahitabo diha sa barangay Bulacao, Talisay niadtong Martes sa alas 5:20 sa hapon.

Si Police Superintendent Romeo Perigo, hepe sa kapolisan sa siyudad sa pakighinabi niini sa Banat News kagahapon sa buntag mibutyag nga duna untay posibilidad nga ang tulisan dili makapanulis ug ang gwardiya nga si Roger Sebastian, 47, minyo, makabawos unta kini sa pagpusil ngadto sa tulisan apan ilang nasuta nga walay bala ang pusil niini.

Nasuta usab sa mga polis nga usa lang ang buhi nga bala ni Sebastian ug dunay tulo ka kabhang apan diha lang giloklok sa iyang holster.

Si Perigo nagkanayon nga nagplano siyang motaho ngadto sa buhatan sa Firearms and Explosive Division kabahin sa maong hitabo ug iyang awhagon ang maong buhatan nga ipasusi ang tanang mga security guards kinsa nadestino sa Talisay ilabi na ang mga nadestino sa mga commercial area sa siyudad aron masuta kung unsa ka preparado ang mga security guard kung adunay parehong insidente nga mahitabo.

Daling gidala diha sa Talisay District Hospital si Sebastian kinsa nakaangkon og samad pinusilan sa walang bahin sa lawas ug tuong paa apan pasado alas 9:00 sa gabii sa maong adlaw gideklara si Sebastian nga patay na sa doktor sa maong tambalanan.

Nadala sa tulisan ang P20 mil nga salapi nga halin ug dali kining miikyas paingon sa sudlonon nga bahin sa sitio Hawod sa maong barangay.

Ang maong insidente maoy una nga nahitabo niining tuiga sa Talisay diin usa ka establisamento ang nabiktima sa pagpanulis.

Ang hepe midungag nga na-rattle ang nahisgutang tulisan hinungdan nga nalabay niini ang ubang kuwarta nga iyang nadala apan wala pa nila mapiho ang kantidad sa kwarta nga na-recover.

Ang tulisan daling mihubo sa jacket niining gisul-ob ug nahibilin pa gyud ang ball cap niini.