Liddawa gisuspenso, Archival di mag-mosyon

Gimandong suspensuhon ang kontrobersyal nga opisyal nga polis nga nakulatahan sa mga sakop  sa media gumikan  sa kahubog niini ug nanghagis dihang nakabangga niini ang sakyanan sa newsmen niadtong milabay'ng tuig.

Gumikan sa maong hitabo gikasuhan si Sr. Insp. Jose Liddawa ni Sr. Supt. Rodel Calungsod, director sa Mandaue City Police Office og grave misconduct base sa footage.

Sa video footage nagpakitang hubog kaayo ang maong opisyal dihang giatake niini ang ABS-CBN news crew nga sila si Ramil Paican ug camera man Joel Noel dihang mabanggai niini ang sakyanan sa mga mediamen, apan dihang kini gialam-alaman wala kini mopatuo ug nanakit hinungdan nga nakulatahan siya sa mga newsmen.

Ang maong desisyon nakab-ot human makakita ang hearing officer nga gikan sa Negros nga si Sr. Insp. Troy Warren Cayanan og igong basehan pagsilot kaniya.

Si Liddawa girekomendar nga silotan og kinse ka adlaw nga suspensyon nga walay dawaton sweldo ug gi-forfeit usab tanan niyang productivity bonuses.

Si Sr. Supt. Vicente Loot, hepe sa Regional Human Resource Development Division (R1) sa Police Regional Office-7 miklaro nga kining maong suspensyon mao ra gihapon kini sa nahauna  nang nigawas nga report sa miaging tuig apan karon palang gyud kini hingpit nga nalagdaan.

Matud pang Loot sa Banat News nga himoan nalang kini og order aron  hingpit na nga pagpatuman sa silot. Wala hinuon makakuha og kopya sa maong kamandoan ang mga sakop sa media kagahapon.

Matud pang Police Regional Office-7 director, Chief Supt. Ronald Roderos sa pakighinabi sa mga tigbalita nga napamatud-ang sad-an si Liddawa sa kasong grave misconduct tungod sa gipakita niining kawalay disiplina dihang nahitabo ang kaguliyang diha sa dakbayan sa Mandaue niadtong Septembre 3 sa kaadlawon.

Dunay gihatag nga napulo ka adlaw aron pasumitiron og motion for reconsideration si Liddawa.

Apan ang manlalaban ni Liddawa nga si Atty. Noel Archival sa pakighinabi sa Banat News nagkanayon nga wala pa siya makadawat sa kopya sa maong order.

Apan bisan paman niini wala usab silay laraw nga mopasaka pa og mosyon tungod kay kung buot huna-hunaon naserbisyuhan na ni Liddawa ang maong silot sukad pa niadtong migawas ang unang report kabahin sa desisyon.

“Kini siya nga penalty mahulog ra ni siya nga good as served na, and I will no longer file a motion for reconsideration aron matapos na ning maong estoryaha,” asoy pang Archival.(Edwin Ian Melecio)