Politika ang gidudahang nagpaluyo sa konseho nga pagtangtang sa mokabat P1.5 milyones nga gahin sa Emergency Rescue Unit Foundation (ERUF) gikan sa giaprobahan nga annual budget karong tuiga.
Apan gipanghimakak kini ni Bise Mayor Carlo Fortuna ug iyang gipasabot nga ang paghatag og gahin alang sa mga pribadong kahugpongan nagkinahanglang masunod ang gilatid nga mga lagda sa balaod.
“Rules needed to be followed in handling out donations to non-government organizations (NGO) like ERUF,” nagkanayon si Fortuna.
Sa pagkuhag pundong salapi nga itabang sa mga NGO’s ug people’s organization (PO’s) wala magkinahanglan nga ilakip ang pangalan sa kahugpongan sa giaprobahan nga gahin.
Dugang pa niya kay kun ilakip ang paghingalan sa kahugpongan sa aprobahan nga annual budget, nagpakita lang nga gipaboran na daan ang hingtungdan nga pribadong kahugpongan.
Si Fortuna miingon nga ang pagtuo nga "politically motivated" ang ilang gihimo, usa kini ka dakong sayop ug walay lig-ong basehanan sanglit igo lamang nilang gituman ang pamaagi nga maoy labing gikinahanglan.
Sa nasayran nga ang gahin nga mokabat sa P1.5 milyones sa ERUF ang gilakip ni Mayor Jonas Cortes isip pagtuman sa iyang tinguha nga mahibalik ang operasyon niini sa dakbayan nga nabalhin sa dakbayan sa Sugbo niadtong 1990.
Gipasabot ni Fortuna nga ang labing unang pagahimoon sa ERUF mao ang paghatag og mga kondisyones sa dili pa ikapagawas ang gahin alang sa financial assistance.
Naglakip niini mao ang pag-accredit niini ngadto sa kagamhanan sa dakbayan.