Sundalong gisuspetsahan sa pagpatay way labot

Wala malambigit si T/Sgt.  Roger Emnace nga nadistino isip detachment commander sa Caurasan 28th IB sa Philippine Army sa barangay Caurasan, lungsod sa Carmen ang kalambigitan sa pagpamusil patay nga nahitabo niadtong Enero 23 sa gabii sa Dapdap, Poblacion III, Carcar,

Kini ang nasayran sa Banat News gikan kang SPO3 Jonas Pananganan, hepe sa kapolisan sa maong lungsod nga nagkurihir sa nahaunang taho sa Banat News nga niadtong Enero 29 niining tuiga nga gilambigit ang iyang pangalan sa maong pagpamusil.

Giklaro ni Pananganan nga base sa imbestigasyon ilang nasuta nga ang nagpusil patay kang Ronilo Samonte, 20 anyos nga gaff maker sa maong dapit mao lamang si Dennis Emnace  nga igsoon ni T/Sgt Roger Emnace ug nagpuyo sa maong dapit.

Sa unang migawas nga report ang sundalong si Emnace naapil sa nahasulat nga suspek sa pagpamusil apan kini miklaro sa linagdaang affidavit niini nga wala gyud kini mogawas sa balay atol sa pagbuto-buto sa armas dili layo sa ilang balay tungod kay nakuyapan ang iyang asawa tungod sa kahadlok.

Matud pa ni Pananganan nga nagdukoduko sa pagbuhat og buwang ang biktima dihang mitumaw si Dennis nga nagdala og armas ug gipusil ang ulo nga maoy nakaingon sa kamatayon niini.

Dugang pa niya nag-overtime sa pagbuhat og buwang ang biktima sanglit dinalian ang order nga gikatakdang ihatod sa Mambaling, dakbayan sa Sugbo sa pagka ugma sayo sa buntag ug wala kini makamatikod sa paghiabot sa suspetsado.

Si Pananganan miingon nga gitubag nila ang alarma ug maoy iyang kauban sila si SPO1 Oscar Cantay, SPO1 Nestor Gascon SPO1 Socrates Pamilgan ug SPO1 Alcoriza Jr nga maoy ilang naabtan ang biktima nga nagbuy-od ug patay na niadtong higayona.