Inspeksiyon sa DOLE suportado

Gisuportahan sa  hunta probinsiyal ang plano sa Department of Labor and Employment (DOLE)-7 nga mohimo og inspeksyon sa mga pribadong  kompaniya dinhi sa Sugbu ug kasikbit nga lalawigan aron sutaon kun naghatagan ba gyud sa minimum nga suholan sa mga mamumuo nga P250 matag adlaw.

Si Bokal Juan Bolo kinsa maoy sponsor sa maong resolusyon nagkanayon nga ang suholan matag adlaw sa mga mamumuo   maoy gikuhaan sa inadlaw-adlaw nga mga panginahanglanon sa ilang tagsa-tagsa ka pamilya.

Ang bokal midugang nga dunay mga report nga  iyang nadawat nga dunay pipila ka mga pribadong kompaniya nga wala maghatag og minimum nga suholan nga  P250.

Miingon si Bolo nga ila karong gimonitor ang mga kompaniya sa tibuok lalawigan sa Sugbu. Gani naglaom siya nga ang DOLE-7 mosusi sa labing dali nga panahon kun ang mga kompaniya misunod sa  mando sa Regional Tripartite Wages and Productivity Board.

Ang maong lakang sa  DOLE gitumong aron mahunong ang pagpangabuso sa mga kompaniya ngadto sa mga mamumuo nga wala mohatag og saktong suholan ilabi na niadtong mga kugihan, tarong ug ligdong nga mga trabahante.

Ang maong resolusyon ni Bolo   gisuportahan usab ni Julian Daan. Ang resolusyon gituki kagahapon atol sa ilang sesyon  sa hunta probinsiyal.