Naangol ang licensing chief sa Land Transportation Office sa dakbayan sa Mandaue ug usa ka seaman human mosampak ang sakyanan niini sa usa ka lamppost diha sa dalan Ouano Avenue duol sa Cebu International Convention niadtong Biyernes sa hapon.
Ang naangol mao si Hilario “Ely” Bohol ug ang seaman nga si Fenijune Quiñones, 25, lumad nga taga Simala, lungsod sa Sibonga kinsa pulos nakaangkon og mga bun-og sa kalawasan ug gagmay’ng pangos.
Matud pang PO3 Ruben Cerdena sa traffic section sa Mandaue City Police Office base sa pangangkon ni Bohol kalit kining nalipong samtang nagmaneho sa iyang awto nga Nissan Sentra nga may plakang YFN-657 ug misuway kini sa pagpadaplin aron ihunong ang sakyanan.
Apan sa pagmaniobra niini nadasmag niini ang usa ka lamp post nga duol usab sa gibarugan ni Quiñones kinsa nagpaabot nga motabok sa dalan. Si Quiñones naigo sa naguroy nga lamp post ug nadala usab uban kang Bohol sa Mandaue City District Hospital.
Nasuta nga ang maong sakyanan gipanag-iya sa anak ni Bohol ug padulong na kini niadtong tungura sa ilang panimalay sa Subangdaku.
Dugang pa ni PO3 Serdena nga ang boksidor nga si Malcolm Tuñacao nga nahiagi sa maong dapit gikan sa dakbayan sa Sugbu maoy dali nga nakatabang nila ni Bohol ug Quiñones ug maoy midala sa mga biktima sa tambalanan.
Human sa pasiunang pagtambal kang Bohol sa mga doktor dali usab kining gibalhin ngadto sa Perpetual Succour Hospital sa dakbayan sa Sugbu alang sa tukmang pag-atiman sa mga doktor.