Usa ka dalaga ang nabun-og sa ulo human gibukbok og pusil sa usa sa tulo ka wala mailhing tulisang mitulis kaniya diha sa Felina Village sa barangay Tisa niadtong milabay’ng gabii.
Ang biktima giilang si Melissa Rondina,20, residente sa maong dapit nakuhaan og bag nga may sulod nga cellphone ug pitaka uban sa mga importanteng dokumento.
Matud pa sa kapolisan ang biktima nagpaabot og masakyang jeepney dihang gihunongan sa tulo ka lalaking sakay og kolor itom ug pula nga motorsiklo ug ang usa mition og armas dayong deklarar og tulis.
Sa kahadlok wala na molihok ang biktima dihang gikuha iyang bag apan una pa mobiya ang mga tulisan gibukbok siya sa puloan sa armas diha sa ulo.
Ang biktima daling misumbong sa kapolisan apan wala na madakpi ang tulo samtang gidala siya sa tambalanan aron magpatambal.