Hunta naalarma sa mga armado

Giawhag ni Provincial Board Member Juan Bolo ang Cebu Provincial Police Office (CPPO) nga susihon ang taho nga dunay presensya sa mga armadong grupo nga nasigpatan sa mga lumolupyo diha  sa bukirang bahin sa Bugho, utlanang barangay sa San Fernando ug Pinamungahan.

Matud ni Bolo nga nangahadlok na ang mga residente sa maong lugar gumikan usab sa ilang pagtuo nga mga sakop sa rebelding New Peoples Army (NPA) ang maong mga armadong tawo nga nasigpatan.

Kahinumduman niadtong kaadlawon sa petsa 18 ug 21 sa Enero niining tuiga ang mga lumolopyo sa dapit nisumbong sa kapolisan human nila makit-i ang tulo ka mga tawo nagbitbit og tag-as nga kalibre sa armas.

Niingon si Bolo nga kinahanglan ma-imbestigar sa kapolisan kining maong report ug matino usab kung si kinsa ang maong mga armadong mga tawo nga nagsuroy-suroy sa nahisgutang dapit.

Gipasabot sa bokal nga obligasyon sa kapolisan ang pag-protiher sa mga lumolupyo sa usa ka lugar, kinsa nahasi gumikan sa pagtumaw sa armadong grupo.

Si Cebu Provincial Police Office Director Sr. Supt Carmelo Valmoria human makadawat sa maong report nimando gilayon sa iyang mga sakop sa San Fernando ug Pinamungahan nga susihon ug panid-an ang mga armadong tawo nga nakit-an sa mga lumolopyo sa mao nga dapit .