Mga minor nga chicks gikagubtan sa Liloan

Mga minor de edad nga kababayen-an nga magyampungad sa mga videokehan sa barangay Jubay,  lungsod sa Liloan   gikagubtan sa mga kalalakin-an.

Kini ang gipadayag ni  Kagawad Nelson Sungahid,  chairman sa peace and order council sa barangay Jubay nga nahinabi sa Banat News kagahapon.

Matud pa niya nga gikan sa dakbayan sa Sugbu ang maong mga minor de edad nga kalit lang motumaw didto sa ilang dapit nga mosulod sa mga videokehan alang sa pagpangita og kustomer nga kalalakin-an.

Si Sungahid miingon nga mireklamo ang usa ka asawa sa ilang dapit ngadto kanila ug nagpatabang kini sa pag-apas sa iyang bana ngadto sa sulod sa videokehan uban sa minor de edad nga kababayen-an.

Dugang pa ni Sungahid nga  ang pipila  sa maong mga babaye nga minor de edad nga iyang nahinabi gikan sa dakbayan sa Sugbu ug adunay mga taga dakbayan sa Mandaue.

Si SPO1 Claudio Castro Jr nga nahinabi sa Banat News kinsa nakadawat usab sa maong taho nga pagdagsang sa mga minor de edad sa maong lugar.

Gipadayag niya ang paghimo og dinaliang pakisusi alang sa paghatag og pagtagad sa maong reklamo nga gipadangat ngadto kanila. (Romeo T. Limpangog)