Gidoble ang pagpalig-on sa seguridad sa palasyo sa hustisya dinhi sa Sugbu aron pagseguro nga dili mahitabo dinhi sa Sugbo ang shooting incident nga nahitabo sa Manila Regional Trial Court niadtong Martes sa buntag diin namatay ang kanhi mayor sa Sapang Dalaga Misamis Occidental nga si Reynaldo Yap.
Si RTC Executive Judge Fortunato de Gracia mipasalig sa publiko nga dili angay’ng mabalaka tungod kay dili mahitabo sa mga hukmanan dinhi sa Sugbu ang nahitabo sa Manila RTC.
Sugod kagahapong adlawa gidoble ang seguridad nga gipatuman sa tanang mga sala apil na ang gawas nga bahin sa palasyo sa hustisya.
Ang mga tawo nga dunay transaksiyon sa RTC o MTCC ilabi na kadtong mga paryente sa mga akusado ang dili na kini basta basta nga makasulod sa entrance tungod kay tagsatagsa kini nga inspeksyonon sa mga gwardiya.
Gi-obligar usab ang mga tawo nga motambong og hearing o dunay transaksyon sa mga sala sa korte sa pag-sul-ob og Identification Card kun anaa na kini sulod sa palibot sa hukmanan.
Gawas niini, dunay mga laing grupo sa mga guwardiya nga naka-sibilyan ang gipakatap sa palibot sa mga sala sa korte nga igo lang mag monitor sa mga kalihukan sa mga tawo sulod sa korte.
Miapelar hinuon si de Gracia sa publiko nga mosabot lang sa gamay’ng mga kahasol nga masinati sa higayon nga moanha sa korte tungod kay tipik ug kabahin kini sa higpit nga seguridad nga gipatuman nila aron paglikay sa mga dautang panghitabo.