Banilad flyover gipa-oktaba

Ang konseho sa dakbayan sa Sugbu kagahapon miawhag sa kadagkoan sa Department of Public Works and Highways (DPWH) sa pag-oktaba sa petsa alang sa pagsugod sa pagtukod sa flyover project diha sa barangay Banilad.

Si Bise Mayor Michael Rama wala hinuon maniguro nga ang awhag sa konseho maaprobahan sa kadagkoan sa DPWH, apan ilang gilantaw nga kun sugdan ang pagtukod karong panahona makamugna g’yod kini og grabeng problema sa trapiko.

Bugtong si Konsehal Raul “Yayoy” Alcoseba lang ang wala makagusto sa pag-uktaba sa pagsugod sa construction sa flyover project tungod kay bisan og adto na kini sugdi sa Marso nga wala nay klase ang mga tunghaan, makasinati ra gihapon og problema ang mga tinun-an sa buwan sa Hunyo.

Ang pagtukod sa 390-meter nga flyover project gibana-bana nga mahuman sulod sa 10 ka buwan, apan ang WT Construction mipasalig nga humanon nila ang proyekto sulod lang sa unom ka buwan.

Si DPWH-7 regional legal officer Agustinito Hermoso namahayag nga ang katukoran sa maong flyover project nauktaba na sa taas-taas nga panahon kay gitakda unta kini nga sugdan kaniadto pang Oktobre.

Nagtuo si Hermoso nga ang kadagkoan sa DPWH dili na mosugot nga langayon pa ang katukoran sa proyekto.

Si DPWH district engineer Nicomedes Leonor nagkanayon nga kun malangay pa ang pagmugna sa flyover project hayan nga makapausbaw kini sa bayranan sa kagamhanan tungod sa pagsaka usab sa presyo sa mga construction materials.

Si Rama mipasabot nga kun uyonan ang awhag nga iuswag ang pagsugod sa construction, atul sa maong mga adlaw kinahanglang himoon ang mga pagpangandam nga mapaminus ang problema sa trapiko unya sa panahon nga sugdan na g’yod ang katukoran sa proyekto.