Gikan gipusil, giusban patay

Gikan pa nalandig sa tambalanan sa dakbayan sa Sugbo human pusila ang usa ka mag-uuma sa milabay'ng buwan, gipusil napod og usab sa niaging hapon nga niresulta sa pagkamatay niini diha-diha sa Sitio Cantim-as, Barangay Salug bukirang bahin sa lungsod sa Dalaguete nga gibana-banang 30 kilometro gikan sa Poblacion.

Ang kapolisan natahap nga ang kriminal mao lang gihapon kadtong mipusil ni Wenceslao Getutua,  40, minyo, mag-uuma ug residente sa nahisgutang barangay.

 Ang grupo ni SPO1 Geraldo Modequillo ang daling mialarma human sila makadawat og taho sa maong insidente.

Base sa taho nga ang mga kabanay ni Getutua mao nay nakadiskobre sa patayng lawas sa biktima nga nagkadugo ug natusak-tusak sa bala ang lawas niini diha sa waiting shed sa nahisgutang dapit nga gituohang maoy hinungdan sa iyang kamatayon.

Dugang impormasyon nga nahipos sa grupo ni SPO1 Modequillo nga ang biktima gikan pang nigawas sa Vicente Sotto Memorial Medical Center nga nagpaalim sa operasyon sa pinusilan sa niaging bulan.Matud ni SPO1 Modequillo nga nahinabi sa Banat News ang biktima niadtong tungora nagpahatod og habal-habal ug nanaog sa waiting shed.

Atol sa maong hitabo walay bisan usa ang nakakita sa maong pagpamusil tungod kay layo sa mga balay sa lugar nga nahitaboan.

Ang kapolisan nakarekober sa crime scene og nabungkag nga slug, plastic sa shotgun ug duha ka tumoy sa mahait nga hinagiban, nga gituohang iya sa kriminal.

Apan si Modequillo nagkanayon nga layo ang posibilidad nga mailhan ang mipusil sa biktima sanglit walay  kooperasyon ug labaw  dili motingog kun pangutan-on sa mga polis ang mga residente sa lugar. (Rey B. Pasaporte)