Poste sa transco gisunog

Usa sa duha ka poste sa Transco nga nagsuplay og kuryente sa habagatang bahin sa lalawigan sa Sugbu nga nahimutang diha sa Upper Pitalo, San Fernando, usa ka kilometro ang distansya gikan sa National Highway  gisunog sa wala mailhing mga tawo sa niaging gabii nga miresulta sa pagkawagtang sa sugang dagitabnon.

Niini nakasinati og total black out ang 17 ka lungsod   sa siyudad  sa  Carcar, lungsod sa Barili, Dumanjug, Ronda, Alcantara, Moalboal, Badian, Alegria, Malabuyoc, Ginatilan, Santander, Samboan, Boljoon, Alcoy, Dalaguete, Argao, ug  Sibonga   pasado alas 6:58 sa gabii hangtud na kagahapon sa buntag.

Ang poste nga kahoy tupad sa tower sa Transco diin dunay buhing kuryente ang nagkutay paingon sa tower.

Ang pangulo sa kapolisan sa probinsya sa Sugbu Sr. Supt. Carmelo Valmoria nga nahinabi sa mga tigbalita kinsa maoy nangulo pag-adto sa nahisgutang lugar uban sa mga sakop sa Special Reaction Unit (SRU) kagahapon miingon nga dili pa niya makompirmar kun binuhatan sa mga rebelding kumunista ang pagsunog sa maong poste hangtud dili mahuman ang imbestigasyon sa kapolisan sa San Fernando.

Niadtong petsa 18 ug 21 sa kaadlawon naalarma ang mga residente sa bukirang barangay sa Bugho utlanan sa San Fernando ug Pinamungahan human makit-i ang tulo ka armadong mga tawo nga nagbitbit  og tag-as nga kalibre sa armas hinungdan nga dali  silang misumbong sa mga polis sa Pinamungajan.

Matud niya, walay mga rebelding kumunista ang naglihok sa bukirang bahin sa San Fernando kun dili duna hinuoy mga supporters.

Usa ka Leony Bacus, residente sa dapit nga nahinabi sa  Banat News nagkanayon nga ilang nakita nga nagdilaab nianang pagkagabii ang poste apan wala hinuon maklaro kun  pila ka tawo ang misunog niini.

Si SFO4 Virgelio Gelig, fire marshall sa San Fernando mikuha sa poste nga nasunog ug langkay nga maoy gigamit pagdaob sa poste aron ilang ipadala sa PNP Crime Laboratory aron ipaeksamin.

Nagtuo ang mga otoridad nga gigamitan og gasolina ang pagdaob sa maong poste kinsa layo kaayo sa mga balay.

Dunay ticket sa lotto ang nakit-an sa mga sakop sa SRU ug himuong ibedensya.

Gibutyag sa tigpamaba sa Central Command (Centcom) Lt. Col. Jeferson Omandam dihang nahinabi sa Banat News nga nakadawat sila og inisyal nga report nga binuhatan sa armadong grupo nga sakop sa rebeldeng NPA ang misunog sa poste sa kuryente sa Upper Pitalo, San Fernando.

Gipasalig ni Omandam nga palapdan nila ang imbestigasyon aron matugkad ang tinuoray'ng hinungdan sa maong panghitabo.

Hinuon ang tigpamaba sa Transco nga si Benjamin Ipil mikunpirmar sa poste nila sa atubangang bahin sa usa ka pabrika sa semento sa San Fernando nga gituyo og sunog ug maoy hinungdan sa lapad nga black-out nga nasinati  gikan sa siyudad sa Carcar paingon sa lungsod sa Santander.

Gitug-an ni Ipil nga nagsugod ang maong black out alas 6:48 sa milabay'ng gabii ug pasado alas 7 na sa buntag kagahapon nabalik ang suplay sa kuryente human usab gidoble ang trabaho sa ilang mga linemen pag-ilis sa gisunog nga poste.

Matud ni Ipil ang poste nila sa San Fernando maoy nagsuplay og kuryente alang sa mga konsumidor sa Cebu Electric Cooperative (CEBECO-I).