Palyado nga makina rason sa pagkahagsa sa Huey chopper

 Pagpalyar sa makina maoy usa sa nakitang hinungdan sa pagkahagsa sa UH-1H 757 Chopper sa Philippine Air Force   didto sa lungsod sa Balamban sa milabay’ng Sabado.

 Kini ang giluwatang pamahayag ni Brig. Gen.  Arthur Mancenido, commanding general 205 Tactical Helicopter Wing   sa PAF sa Mactan Benito Ebuen Air Base (MBEAB) sa dakbayan sa Lapulapu nga nahinabi sa Banat News.

 Matud pa ni Brig. Gen. Mancenido base sa ilang pasiunang imbestigasyon ngadto sa duha ka mga piloto nasuta nga adunay pagpaltos sa power sa makina sa maong chopper sa dihang mihimo kini og pag-maneuver atol sa ilang pagpahigayon og Navigation Flight Training  sa Balamban.

 Gipasabot ni Mancenido nga ang tulo ka chopper nga nag-convoy niadtong higayona gikan sa dakbayan sa Ilo-Ilo mihimo og maneuvering execution sa maong dapit diin ang duha ka chopper milampos kini apan ang 757 sa dihang mipaubos kini sa maong dapit paingong landing na pagbalik niini og  lupad wala na makabawi ang maong chopper gumikan kay mipid-ok ang makina ug dili na mosaka pataas ang   chopper hinungdan nga nangita nalang og kalandingan ang piloto apan nahagsa  na hinuon kini sa maong dapit.

 Matud pa ni Maj. Gen. Nicomedes Corpuz,  commanding general 2nd Air Division   sa MBEAB nga “the pilot was not  able to apply a complete power mix” hinungdan nga wala makabalik sa taas ang chopper sa maong training.

 Gibutyag usab ni  Mancenido nga gawas sa duha ka piloto ug duha ka crew niini aduna pay lima ka mga sakop sa Air Force nga luwan sa 757 gikan sa Ilo-Ilo gumikan  kay igo lang kini nga misakay kanila pabalik sa Cebu human sa lubong sa ilang kauban nga namatay  didto sa Ilo-Ilo. Apan gipanghimakak nga kini mga civilian.

 Gipasabot  ni  Mancenido nga gilibkas na ang mando sa pag-ground sa mga chopper kagahapon gumikan sa daghan pang gimbuhaton sa operasyon sa militar apan nagpadayon ang imbestigasyon ug ang duha ka piloto nga sila si Capt. Milo Arañes ug Capt. Jack Rey Musomos maoy wala pa hatagi og mando nga makapalupad og laing helicopter sa PAF gumikan sa ilang kahimtang sa panglawas.

 Samtang si Sgt. Leovehildo Depedra ug Sgt. Jose Maria Emperado luwas na sa kahimtang apan wala pa usab kini hatagi  og  laing gimbuhaton.

 Ang UH-1H 757 maoy gihatag sa mga Amerikano gikan sa ilang Excess Defense Articles sa Armadong Kusog sa Estados Unidos didto sa Clark Air Base niadtong Agosto 2006 ug na-turn-over kini sa 205 THW niadtong bulan sa Oktubre 2007 diin gibanabana nga mokabat kini sa P30 milyones.

 Gumikan sa pagkahagsa sa UH-1H 757 helicopter aduna na lang 44 ka mga UH-1H chopper ang nahibilin ubos sa 205 THW lukop nasud nga maoy bugtong gigamit sa mga militar sa ilang mga operasyon ilabi na didto sa Mindanao.