Batan-on gipatay sa sundalo, igsuon

Batan-on nga tiggama og bulang sa manok igtatari namatay human gipusil sa silingan niining sundalo ug igsuon niini sa miaging gabii sa sitio Dapdap, barangay Poblacion III, siyudad sa Carcar.

Nakaangkon og samad pinusilan sa iyang tuong ulo ug milapos ang bala sa walang dunggan ni Ronilo Samante, tiggama og bulang sa maong lugar.

Kini human pusila si Samante sa magsuong si Technical Sergeant Roger Emnace ug Dennis Emnace. Si TSgt Emnace sakop sa 12th Infantry Battalion sa Philippine Army, apan nadestino sa 78th Infantry Battalion sa Philippine Army nga nagbase sa Dunggoan, dakbayan sa Danao, ug maoy nagsuperbisar sa mga Sugboanong sakop sa Citizens Armed Forces Geographical Unit (Cafgu).

Sa imbestigasyon ni SPO3 Jonas Pananganan, officer in charge sa Carcar Police Station, nasayran nga sa alas 8:40 sa gabii, si Samante naghimo og bulang sa manok sa usa ka gamay nga payag sa naasoy’ng lugar.

Kalit naabot ang sundalo uban ang igsuon niini ug walay daghang estorya gipusil si Samante tumong sa ulo gamit ang wala matino nga kalibre sa armas nga maoy nakaingon sa hinanali niining kamatayon.

Sumala pa sa pakisusi ni SPO3 Pananganan nga panimalos maoy nakita nilang hinungdan sa pagpamusil.

Base sa imbestigasyon, nasota nga si Samante maoy gipasanginlang midaob sa motorsiklo nga gipanag-iya sa umagad nga lalaki ni TSgt Emnace.

Tungod sa maong insidente, si Samante gikiha sa tag-iya sa motorsiklo ug pending karon ang kasong “arson” sa Cebu Provincial Prosecutor’s Office.

Ang kapolisan nagkanayon nga aduna na silay kasayuran sa gitagoan sa magsuong Emnace hinungdan nga ila kining himoan og operasyon aron sa pagsikop niini.