Konsehales sa mga brgy. nadismaya

Dismayado ang pipila ka mga konsehal sa kabarangayan sa dakbayan sa Sugbu nga   magpapili sa umaabot nga eleksyon sa Liga ng mga Barangay Kagawad ng Pilipinas (LBKP).

Usa ka kandidato pagka-board of directors nga dili gustong magpahingalan miingon nga sila nakasugod na pagpangampanya alang sa ilang eleksyon nga gitakda karong Pebrero 16, apan siya nahakurat dihang gitunulan na lang sila og  endorsement letter gikan sa ilang barangay secretary nga nagagikan kang Mayor Tomas Osmeña naghangyo sa tanang mga konsehal nga iyang kaalyado, nga suportahan ang mga kandidato sa grupo ni Konsehal Manuel Guanzon sa barangay Capitol Site.

Wala ilimod sa tinubdan ang iyang kasagmuyo tungod sa iyang pagtoo nga modaug sa ilang eleksyon kung wala lang manginlabot ang mayor.

Gitataw hinuon sa konsehal nga supak man sa iyang kabubut-on, siya mapugos pagsuporta sa gusto ni Osmeña isip kaalyado usab niini.

Gani nagplano ang konsehal nga tinubdan nga mo-withdraw na lang sa iyang kandidatura aron pagpakita sa mayor nga siya mosuporta ngadto sa ilang kaatbang nga grupo.

Ang mga kauban ni Guanzon nga lakip sa giindorso ni Osmeña mao sila si Konsehal Ilde Carillo sa barangay Duljo-Fatima isip external vice president, Konsehal Fritz Herrera sa barangay Lorega ug Konsehal Ray Salgado sa barangay Punta Princesa isip vice president for the north and south district.

Konsehal Edith Fernandez sa barangay Tinago isip secretary,  Dante Tabucal sa barangay Sudlon 1 isip treasurer,   Rey Francisco sa barangay Carreta isip auditor.

Samtang ang mga board of directors naglakip nila ni konsehal Elmer Ruiz sa barangay Mabolo, Konsehal Lito Ardiente sa barangay Guba, Konsehal Winefredo Miro Junior sa barangay Ermita ug ang Konsehal sa barangay Tejero nga de kalibre ug beteranong reporter usab sa The Freeman nga si Garry Lao nga maoy naglangkob sa north district.

Samtang sa south district ang mga kandidato pagka-board of directors naglangkob usab nila ni Konsehal Ramon Tiong sa barangay Kalunasan, Konsehal Joel Ibones sa barangay Cogon-Pardo, Konsehal Anna Tabal sa barangay Tagba-o ug ang drama talent, writer ug director sa DYHP-RMN CEBU nga si Konsehal Simeon Romarate sa barangay Basak-Pardo.