“Pusher,” 2 runners nadakpan

Usa ka  gipasanginlang level 2 drug pusher ug laing duha niini ka runner ang nasikop sa kapolisan sa gihimong pagpangronda sa Regional Anti Illegal Drugs Special Operation Task Group (RAIDSOTG) kagahapon sa buntag  diha sa barangay Matab-ang Toledo City.

Dul-an sa 60 ka gidudahang shabu ug paraphernalia, ang nakuha sa operatiba sulod sa balay ni Jerry Sanchez 39, minyo, residente sa nahsigutang lugar.

Giapil pagdakop ang duha niya ka mga runners og shabu nga sila si Sandro Lopera 30, minyo, residente sa dapit ug Fernando Castro 44, nga taga Buanoy, Balamban.

Ang grupo ni Police Inspector Keneth Paul Albotra sa Intelligence and Operation Officer sa RAIDSOTG armadog search warrant sa kalapasan sa akta Republika 9165 nga giluwatan ni Regional Trial Court Branch 58 Judge Gabriel Inglis.

Mokabat sa 50 ka mga pakete nga may sulod nga gidudahang shabu nga nagkantidad matag usa niini og P300 ug duha ka bulto nga tag P25,000 matag putos, notebook ug papel nga listahan sa mga pangan sa drug pusher nga nakautang ni Sanchez og ginadiling drugas.

Nidugang si Albotra nga si Sanchez mohalin og 258 gramos o sobra pa niini matag semana sa ginadiling drugas.

Atol sa maong operasyon ang mga operatiba nagdala og mga sakop sa Media ug barangay tanod ug ilang gisuwayan og palit og shabu si Sanchez gamit ang marked money una pa nila gi-served ang search warrant.

Gikompirmar usab ni Albotra nga si Sanchez anaa sa ilang watchlist ug nag-operate sa Toledo City ug mga silingang lungsod.

Si Sanchez gisuwayan untag kuha og reaksyon apan nagdumili sa paghatag og komentaryo.