Nangitang “Goliat” naghikog

Patay nang midangat sa Cebu City Medical Center kagahapon sa gabii ang usa ka panday human miunay sa pagkutlo sa iyang kinabuhi ginamit ang armas nga iyang nailog sa DyHP Radio station niadtong Martes sa hapon ug pagkagabii nagpusil sa iyang ulo sa balay nga iyang gitrabahoan.

Gituohang ang problema niini sa pamilya ug sa nadispalkong kwarta sa iyang agalon aron ipalit og materyales sa balay nga gipatrabaho kaniya maoy gituuhang nakapaaghat sa biktima sa paghikog.

Ang biktima giilang si Benito Undang,Jr. human kini magpusil sa tuong tampihak sa iyang ulo nga milahos sa pikas tampihak, nakabsan sa iyang kinabuhi ang biktima alas 10 na pasado sa gabii.

Sa imbestigasyon sa taga Homicide Section sa Cebu City Police Office nasuta nga ang biktima sayo nianang Martes sa hapon miadto sa sibyaanan DyHP sa dalan Osmeña Blvd. ug nangita kang komedyanteng si Allan Nacorda nga mas nabantog sa pangalang “Goliat.”

Matud pa sa gwardiya sa DyHP nga nailugan sa armas nga si Jose Branzuela sayo niana nangita si Undang kang Nacorda apan gumikan kay dunay laing gibuhat ang naulahi wala kini maatiman ug gipapaabot lang.

Nagtuo usab si Branzuela nga managhigala si Nacorda ug si Undang tungod kay makadaghang higayon na kining mag-anhaan sa ilang estasyonan ug mangita sa komedyante.

Si Nacorda sa iyang bahin mitug-an sa Banat News nga niadtong miaging semana palang sila nagkaila ni Undang ug kini misugilon nga gusto niining pabuhatan og drama ang iyang kinabuhi apan gumikan kay hubog kini gisultihan kini ni Nacorda nga pabalikon lang kung dina kini hubog.

Sa siyam ka mga text messages ni Undang ngadto sa iyang kapuyong si Marife Dayag, 22, taga Waling-Waling Street sa Phase 4 Saint Jude Acres mihisgut kini nga “gisayangan” kini sa i-offer niya kang Goliat.

Diha usab sa maong text iyang gibutyag ang iyang pag-ilog sa armas ni Branzuela, ang kabahin sa taxi driver, ang paghulga niining i-hostage ang mga pasahero sa jeepney nga iyang gisakyan ug ingon man ang mismong pag-agi sa police cars nga nagresponde pagpangita kaniya.

Apan una pa kini maghikog, mipabuto pa kini tulo ka higayon ug sa ikaupat nitumong niya kini sa iyang ulo diha mismo sa balay nga iyang gitrabaho ug gipanag-iya sa usa ka Fil-American nga si Elvie Locke,49, nga iyaan usab sa kapuyo ni Undang.

Ang iya na usab nga agalon maoy midala kaniya sa tambalanan apan nakabsan gyud kini sa kinabuhi.

Base usab sa imbestigasyon gihatagan ni Locke niadtong Enero 19,og 2, 560 aron ipalit og materyales alang sa extension sa panimalay niini.

Apan wala na kini mipakita ug nagsige lang og saad nga kuhaon ang pinalit nga materyales apan wala gyud kini mahitabo.