Amerikano napalgang patay

Patay na nga napalgan ang usa ka Amerikano  sa sulod  sa hotel nga iyang gipuy-an sa City View Pension House sa dalan Sanciangco, dakbayan sa Sugbu  kagahapon sa kaadlawon.

Ang napalgang patay mao si Gary Joseph Ashley, 59 anyos  nga lumad taga P.0.  Box 143 Yellow Stone, N-WY 82190 Montana USA nga  gikaingong sukad pa niadtong Oktubre 2007 nga mi-chek-in sa City View sa dalan Sanciangco ug gikatakda na unta kining mo-checkout sa sunod semana.

Si Freddie Siton nga roomboy sa maong pension house maoy nakadiskubre sa patay’ng lawas sa biktima ug dali usab nga nakatawag sa Emergency Rescue Unit Foundation (ERUF) ang desk sa maong pension house nga si Shen Segobia, 25 anyos.

Sa imbestigasyon sa homicide section sa kapolisan ilang nasuta nga walay foul play ang kamatayon sa maong langyaw ug ang salapi sa biktima nga mokabat P14,599.25  ang ilang napalgan sa sulod sa pitaka.

Dugang nga napalgan sa sulod sa pikata sa maong langyaw mao ang lisensiya sa pagmaneho, Fonkard ID,  Worldperks visa card ug samsung maxima card ug $500 dollar.

Ang tanan nga mga ebidensiya nga ilang nahipos gikan sa lawak sa namatay nga langyaw ang ilang gitugyan sa Scene on Crime Operation (SOCO) alang sa ilang pagkustodiya niini.

Sa nasayran kang PO1 Michael Codaste sa Homicide Section gikan sa mga kawani sa maong pension house nga alas 9 pasado ang takna sa gabii nga nahiuli ang  maong langyaw ug nagsapupo na kini sa kasakit sa iyang dughan.

Ang mga kawani sa maong pension house nga nakamatikod ang mitambag unta niini sa pagpa-check up sa doktor apan misulod kini sa lawak kay mopahulay hangtod nga napalgan nga namatay.

Matud pa ni P01 Codaste nga regular customer na sa maong pension house ang maong langyaw ug nasinati na kini sa mga kawani.

Dugang pa niya nga walay pamilya ang namatay dinhi sa Sugbu ug ang ilang gihimo mao ang pagtaho sa consul sa Amerika dinhi sa Sugbu aron maoy mangita sa mga kabanay didto sa ilang nasud aron sa pagpahibalo sa kamatayon niini. (Uban sa report Guamitto Logrono)