Mary Ann wa magdahum

Wala magtuo si Lahug barangay captain Mary Ann delos Santos nga mohatag kaniya og maayong pagtagad si Mayor Tomas Osmeña atol sa awarding sa Sinulog Mardi Gras niadtong Lunes sa hapon.

Nasayran nga si  Osmeña ug delos Santos naglamanohay ug nagtinagdanay nga nagpahiyom sa usag usa atol sa pagsaka sa stage ni delos Santos dihang maoy nidawat sa premyo sa Lahug nga 4th placer sa Sinulog Based Category,  si Osmeña ang nitunol sa premyo.

Apan matod ni delos Santos nakalitan og nasurpresa siya sa gipakita nga maayong batasan sa mayor ngadto kaniya tungod kay na-andan na sa mga milabay'ng mga adlaw nga kanunay siyang atakihon og masakit nga pulong sa mayor.

Duda hinoon si delos Santos sa gipakitang batasan sa mayor ngadto kaniya apan bisan pa niini giangkon niya nga malipayon gihapon siya tungod kay gipakita nila ang professionalism sa publiko atol sa kapistahan ni Señor Sto. Niño.

Alang sa kapitan sugo sa kahigayunan nga magtinagdanay sila sa mayor ug ihikling lang una ang away sa politika alang ug tungod sa kapistahan ni  Sr. Sto. Niño.