Crips namaregla atol sa fireworks display sa Ayala

Gidudahang   miyembro sa Crips Gang namaregla ug nanunggab atol sa pagpahigayon og fireworks display diha sa Ayala Business Park niadtong gabii sa adlawng Domingo atol sa pagtapos sa Sinulog Grand Mardi Gras ug pagpahigayon og mga street parties sa dakbayan.

Ang gipareglahan ug gidunggab mao si Lloyd Hatosa, 23, residente sa Metabel, barangay Talamban samtang nakigkuyog sa iyang mga barkadang mga lalaki ug mga babaye.

Ang pagpanunggab nahitabo diha sa dalan Rosales sa nahisgutang dapit nga sakop sa barangay Luz samtang ang mga tawo nagpundok-pundok aron pagtan-aw sa fireworks display sa maong dapit.

Sumala pang SPO2 Jay Yballe sa Homicide Section, ang biktima kauban sa 13 ka mga lalaki ug upat ka mga babaye nanan-aw sa fireworks display, duha sa mga kauban niini ang nakakita og lalis sa grupo sa mga batan-on.

Apan samtang dunay nipatungang mga batan-on aron sila husayon kalit nga miduol ang usa sa mga sakop sa Crips dayong duslak sa tuong bahin sa lawas sa biktima.

Matud pa sa biktima bisan siya samaran midagan siya palayo sa dapit hangtud nga naabtan siya sa iyang mga kauban ug gidali og dala sa Perpetual Succour Hospital samtang daling miikyas ang maong gang una pa makaabot ang mga polis.