Pulong Binisaya ipatudlo sa tunghaan

Gihingosgan karon sa Lubas sa Dagan Bisaya (Ludabi) nga mahimong 3rd medium of instruction sa mga publikong tunghaan sa elementarya dinhi sa Sugbu ang pinulongang Binisaya kon Cebuano language niining mosunod nga mga adlaw.

Mao kini gipahibalo ni kanhi Cordova Mayor Arleigh Sitoy kinsa bag-ong napili nga nasudnong Presidente sa LUDABI atol sa gipahigayong ika-52 ka tuig nga anibersaryo niini nga gipahigayon didto sa Casino Español niadtong Sabado.

Matud ni Sitoy nga ang Cebuano language gisugdan na kini karon sa pagtudlo sa elementarya sa grade-1 ug grade-2 didto sa Cordova niining tuiga.

Gibutyag ni Sitoy nga plano nila kining palapdan sa tanang mga publikong tunghaan dinhi sa Sugbu aron pagbanhaw og balik sa atong kinaugalingong pinulongan nga sulod sa pipila ka mga katuigan nakatulog og napasagdan na lang.

Ang dakbayan sa Mandaue ingon man ang Tagbilaran City mipasalig na usab ang mga lokal nga opisyal ning maong mga lugar nga ipatuman sa mga publikong tunghaan ang Binisaya isip 3rd medium of instruction.

Samtang si Mayor Adelino Sitoy sa iyang bahin  mipadayag nga igo lang silang nangayo og pagtugot sa departamento sa edukasyon hinungdan nga napatuman nila sugod karong tuiga ang Cebuano language.

Lakip sa mitambong sa maong convention ug anibesaryo sa Ludabi niadtong Sabado mao si Dr. Jess Terol ang nag-handle sa Cebuano language sa Engineering department sa University of Bohol ug uban pang mga iladong opisyal sama nila ni Mayor Tomas Osmeña ug Gobernador Gwendolyn Garcia. (Darrel Carumba)