Pangilin sa Senyor puno’g paglaum

Ang tinuig nga pangilin ni Senyor Santo Niño  napuno sa pangandoy ug pahinumdom, pangindahay ug paglaum   sa mga nagdeboto niini.

Si 1st District Representative  Eduardo Gullas ang mipadayag niini sa iyang mensahe atol sa 28th Popular Music Festival nga gipahigayon sa Cebu Coliseum niining dakbayan sa miaging gabii.

Matud pa niya nga ang matag deboto nangindahay nga unta makabaton og grasya sa matag tuig human sa iyang kasaulogan sa tinuig nga pangilin.

Sa samang higayon ang  pagsaulog sa tinuig nga pangilin ni Senyor Santo Niño ang mopahinumdom usab natong mga deboto sa pagpasalamat sa mga grasya nga atong naangkon.

Sa laing bahin, si Gullas miingon nga ang tinuig nga pangilin ni Senyor Santo Niño ang napuno usab sa mga pangandoy uban ang paglaum nga maangkon unta ang gitinguhang tingusbawan.

Matud pa niya nga sama sa mabdos nga babaye nga nangandoy nga ang ihimugso niining anak ilang mapadako ug mapatungha nga malampuson.

Gitataw ni Gullas nga ang mga kalihokan sa Pop Music, Sinulog ug uban pa ang maisip nga aksidental lamang sanglit ang labing mahinungdanon   sa iyang kapistahan ang maangkon   ang panalangin sa Labaw nga Makagagahom.

Ang  Popular Music Festival  ang gipahigayon isip halad sa Senyor Santo Niño sa matag tinuig niining pangilin.

Giapilan kini sa mga inila ug bag-ong kompositor  sa Sugbu ug ang 12 ka mga finalist ang paga-awiton atol sa final nga paghukom nga pagatambongan usab sa gatusan ka mga Sugbuanon.

Sa 12 ka finalist karong tuiga maoy midaug sa unang ganti ang komposisyon ni Jude Gitamondok nga nag-ulohan og “Pasayloa Ako” nga giawit usab ni Elviz Somosot.

Ang laing komposisyon ni Jude Somosot nga nag-ulohan og “Bisan Pa” nga giawit ni Arceli Bullo maoy nakadaug sa ikaduhang ganti ug ang komposisyon ni Jun Alino Cabillar nga giawit usab ni Kim Sanchez ang nakakuha sa ikatulong ganti.