“Pusher” sa Bulacao ‘dakpan sa PAIDSO-TG
Nasikop atol sa gipahigayong pagpangronda sa grupo sa Provincial Anti-Illegal Drugs Special Operation – Task Group (PAIDSO-TG) nga gipangulohan ni SPO4 Ernesto Navales ang usa ka suspetsadong pusher og shabu kagahapon sa kaadlawon diha sa Friendly Homes Subdivision, Barangay Bulacao, dakbayan sa Talisay.
Ang suspetsado giila sa mga polis nga si Ernesto Racaza alyas “Totoy”, 45-anyos, minyo, residente sa nahisgutang lugar.
Dala sa maong mga polis ang search warrant nga giluwatan ni Regional Trial Court Judge Silvestre Maamo Jr. sa branch 17 batok ni Racaza.
Nasakmit sa mga polis gikan ni Racaza ang usa ka dakong paketeng shabu, upat ka medium nga paketeng shabu, P4,500 nga salapi nga gituohang halin sa ginadiling drugas, mga plastik nga gituohang gamiton sa pagputos og shabu, duha ka Nokia cellphone, usa ka digital nga timbangan nga gituohang gamiton sa pagtimbang sa nahisgutang drugas ug tulo ka buhing bala sa kalibre .45 nga pistola.
Atol sa maong operasyon ang mga tanod sa barangay nga si Jason Cabañero ug Rolando Bayno ang misaksi.
Si Racaza ang ubos karon sa kostudiya sa PAIDSO-TG ug gikatakda kining pasakaan og kaso.
- Latest
- Trending
