Bisan paman sa mga pasidaan nga gipagawas sa City Traffic Management Office kabahin sa rerouting ug sa oras panak-upan ang kadalanan atol sa prosesyong mahitabo kagahapon daghan gihapong mga sakyanan ang nangatanggong sa kadalanan.
Kagahapon naghuot ang mga sakyanan, pribado o pampasaherong sakyanan sa nagkadaiyang kadalanan duol sa downtown area gumikan sa pagpasira sa dalan P. Del Rosario, Colon, Magallanes Street, Sanciangko Street, Osmeña Blvd. Manalili ug uban pang mga gagmay’ng dalan duol sa Basilica Minore del Santo Niño.
Diha palang sa dalan Gorordo Ave. naghuot na ang mga sakyanan lakip na sa General Maxilom Avenue, M.J. Cuenco; T. Padilla ug dalan Natalio Bacalso Ave. nagdasok na ang mga sakyanan.
Pipila sa mga drayber nasayod sa rerouting ug gani ang uban kanila nag-expect nang daan nga posible gyud silang matanggong apan duna gyuy wala masayod sa rerouting ug kung nahibalo man wala makahibalo kung unsang orasa kini ipatuman ug asang dapita gyud nga mga kalsada kini mahitabo.
Ang resulta, dunay mga sakyanang nangatanggong diha sa mga gipasirad-ang kadalanan tungod kay ang mga tawo nanglakaw naman ug wala nay malutsan ang mga sakyanan.
Kini bisan paman sa 300 ka mga traffic enforcers nga gipakatap sa kadalanan aron maoy mobantay sa mga dalan.
Si CITOM executive director Arnel Tancinco sa pakighinabi sa Banat News kagahapon nagkanayon nga gipaabot gyud nga dunay mga sakyanang matanggong tungod usab sa pagsige og ulan ug ang mga tawo maninguhang makasakay ug ang mga drayber usab makadaginot pa og pasahero.
“Expected gyud na kay nagsige man gyud og ulan, di man nato mapugngan ang mga tawo nga manakay,” asoy pang Tancinco ug midugang nga napangitaan hinuon gihapon kini og paagi.
Usa sa nagrabehan sa nagdasok nga dalan mao ang M. J. Cuenco gumikan kay gihimong one-way ang Arellano Street ug nakadugang sa nagkabalda sa trapiko ang mga vendors nga diha na moplastada sa ilang paninda duol sa agianan sa mga sakyanan.
Nabalik sa hingpit ang dagan sa trapiko pagka-alas 6:30 ngadto sa alas 7 na sa gabii gawas lang sa downtown area tungod usab sa kadaghan sa mga tawong nanglakaw.
Mipasidaan si Tancinco nga karong adlawa mao gihapong mga dalan ang sirad-an apan ang sa N. Bacalso mas patas-an kutob sa eskina sa V. Rama Ave. tungod kay daghan kaayong mga contingents nga mosalmot sa Grand Mardi Gras.