Pasidungog kang Luage

Pormal nang gibuksan kagahapon ang waiting shed nga gipangalan sa napatay nga polis nga si PO1 Noriel Luage isip paghatag kaniya og pasidungog sa sakripisyong paghatag sa iyang kinabuhi isip usa ka polis.

Ang maong waiting shed ginganlan na karon og Luage’s Kiosk diha mahimutang tupad sa buhatan sa Barangay Intelligence Network ug Women’s Desk sulod sa Camp Sotero Cabahug.

Ang maong kalihukan gitambungan ni Sr. Supt. Arnulfo Perez, ang chief of staff sa Police Regional Office-7 ug sa tsirman sa security and order sa konseho nga si Konsehal Agustus Pe ingon man ni Supt. Pablo Labra.

Mitambong usab ang mga kaubanan ni Luage sa Criminal Investigation and Intelligence Branch ug ang iyang asawa nga si Rohama.

Si Perez nagkanayon nga usa lamang kini sa mga pamaagi aron mahinumdoman ang kabayanihong nahimo ni Luage bisan paman kini bag-uhay palang sa serbisyo.

Si Luage napatay niadtong bulan sa Disyembre atol sa pag-serve sa search warrant sa balay batok sa gipasanginlang ‘handler’ sa mga guns-for-hire sa Metro Cebu nga si Ramon Jaime ‘Boy’ Baclohan diha sa barangay Zapatera ning dakbayan.

Si Baclohan napatay usab nianang tungura human kini pusila ni SPO2 Delfin Bontuyan sa Criminal Investigation and Detection Group-7 nga maoy unit nga nangulo sa maong operasyon.

Si Perez nagkanayon nga ilang paninguhaon  nga makapalit ang PNP og mga safety gears sama sa bullet proof vest ug Kevlar helmets aron makaabot pa sa retirement age ang mga bag-ong polis.

Apan dili pa nila masiguro kung kanus-a kini mahitabo, samtang si Pe nagkanayon nga mohatag ang dakbayan og susamang ekipo alang sa CCPO apan napulo lang ka unit ang mapalit niini.

Duna nay resolusyong gipasaka si Pe ngadto sa konseho kabahin niini.

Ang asawa ni Luage mihangop usab sa pasidungog nga gihatag ngadto sa mitaliwang bana.