70 anyos nga “pusher” nakaeskapo sa ronda

Usa ka 70-anyos nga lalaki kinsa giingong pusher og shabu ang nakaikyas sa gipahigayong buy-bust operation sa kapolisan niadtong Huwebes sa gabii sa Sitio Bangkero, Barangay Tayud lungsod sa Consolacion.

Ang maong operasyon ubos sa pag-ayuda sa Philippine Drug Enforcement Agency (PDEA)-7.

Si Police Inspector Leoncio Baliguat Jr., hepe sa kapolisan sa lungsod miila sa suspetsado nga si Ceriaco Salarza, residente sa maong lugar kinsa padayon pa nilang gipangita karon.

Si Baliguat mibutyag kagahapon sa Banat News nga si Salarza  nalakip sa ilang watch list.

Si PO2 Cecilio Miñoza ang gihimong poseur buyer sa nahisgutang operasyon.

Matud sa hepe nga dihang mitunol na og ginadiling drugas ngadto ni Miñoza si Salarza dali silang mipaduol ug nagpaila nga mga polis apan gihapak ni Salarza si Miñoza ug dayon gitukmod hinungdan nga ang maong polis maayong pagkatuwad ug nahitabo ang ginukdanay hangtod kini nakapalayo.

Ang mga polis nakasakmit og 11 ka paketeng shabu ug 100 ka tinabas na nga aluminum foil nga maoy gamiton sa pagsuyop og shabu.