Polis nga nagmaoy sa kahubog nagbitbit sa iyang service firearm samtang nag-duty sa Provincial Security Group (PSG) sulod sa Cebu Provincial Police Office sa may Sudlon, Lahug, ning dakbayan sa miaging gabii.
Si SPO1 Victor Agang nga may pending kaso sa Regional Internal Affairs Service (RIAS) human ireklamo sa duha ka magsuon sa Tabunok, Tabuelan tungod sa pagpabuto og armas, gipadis-armahan ni Cebu Provincial Police director Carmelo Valmoria.
Apan si SPO1 Agang milayat sa koral ug wala na igkita hangtod karon human makadungog nga gipadis-armahan siya ni Valmoria ug ipadakop sa Mobile Patrol Group (MPG).
Sa report ni Sr. Insp. Crisanto Doque sa Provincial Investigation and Detective Management Branch nga samtang naabot siya sakay sa kotse nga gimaneho sa iyang higala, nakit-an niya ang guard-on-duty sa PSG nga nagbitbit og armas ug ang tudlo pirme anaa sa gatilyo.
Nailhan ni Duque nga si Agang ang nagbantay sa gate nga nagbitbit sa armas hinungdan nga iya kining gisitar. Mitubag hinuon ang hubog nga polis pagpangutana, “unsay akong sala sir?”
Gitambagan ni Duque si Agang nga mokalma, ibalik sa sakuban ang armas nga .45 pistola ug matulog na lang, apan gisinggitan na hinuon siya sa polis, “Ikaw gud sir unsa may imong gusto?”
Sa dihang misulod sa Commel Section sa CPPO si Duque, nangayo kaniya og tabang ang iyang higala nga naghatod kaniya tungod kay nalubong sa lapok duol sa flag pole ang iyang sakyanan tungod sa paglikay kang Agang.
Nagpatabang si Duque sa laing duha ka opisyal aron ipa-liquor test si Agang. Apan misinggit hinuon kini ug miingon, “Buang ka, unsa imong gusto? Dili ko pa-liquor test kay mokunsulta pa ko sa ako abogado, isumbong tika ni Col. Sales.”
Si Agang hangtod karon wala pa gihapon pakita sa PSG.
Sumala pa ni Supt. Teofilo Siclot nga padayon pa nilang gipangita si Agang.
Si Agang nga kanhi nadestino sa Tabuelan girelibohan ug gibalhin sa PSG samtang pending pa ang kaso niini sa RIAS.