Usa ka lalaking giingong nagumon sa paghingos og rugby ang napalgang patay nga may hikot sa liog diha sa sitio Lawis Riverside sa barangay Pasil kagahapon sa kaadlawon.
Ang biktima giilang si Richard Tayete,18, nagpuyo sa iyang uyoan sa nahisgutang dapit kinsa matud pa sa mga imbestigador sa Homicide Section base sa nakuhang impormasyon gumon na kini sa paghingos sa rugby.
Sumala pa sa iyang uyoan nga si Jano Sabanal, 53, siya ug duha ka mga kaubanan nangandam sa ilang tindahan baligyaanan og puso dihang duna silay namatikdang tawong nagsandig sa bungbong diha sa maong dapit.
Dihang ilang giduol aron ilhon ug gisangpit wala kini motubag hinungdan nga ilang gisusi ug mao nalay ilang kakugang dihang si Tayete kini nga nagbitay na ug nigahi na ang lawas.
Dali nilang gipahibalo ang kapolisan aron imbestigahon ang kamatayon niini apan walay nakitang timailhang may foul play sa maong insidente tungod kay ang agi lang sa pisi nga nylon diha sa iyang liog ang nakitang samad niini.
Sumala pang PO3 Geoffrey Gutual usa ka semana na ang nakalabay nisuway na og hikog si Tayete pinaagi sa pag-ambak sa gamay'ng taytayan diha nga nagsumpay sa sitio Lawis ug sa barangay Ermita dili layo sa ilang gipuy-an.